Írland hevði ongan kjans móti føroysku vertunum, tá liðini brustu saman í høllini á Hálsi í kvøld.

Føroyar vunnu dystin trygt 3-0, og stóri munurin á liðunum sæst aftur í settúrslitunum, sum gjørdust 25-8, 25-12 og 25-11.

Føroyska liðið spældi øgiliga væl í dag og gjørdi fáar feilir. Servutrýstið var gott, móttøkurnar vóru rættiliga góðar við tí úrsliti, at álopsspælið trýsti írsku mótstøðuna í botn.

Dysturin móti Írlandi er tann fyrsti í EM/HM-kappingini, sum er í høllini á Hálsi í hesum døgum og hann setur eina tjúkka striku undir leiklutin hjá føroyska liðnum sum annar av favorittunum í kappingini, saman við Kýpros.

Hvat av liðunum endar ovast, verður ikki avgjørt fyrr enn í seinasta dystinum, sum verður spældur seint seinnapartin mikudagin.

Áðrenn tað skal føroyska liðið spæla ímóti Liktinstein, sum í dag tapti sín fyrsta dyst móti Kýpros við trimum settum móti ongum.

Føroyska liðið er øgiliga væl fyri í løtuni. Fyri kortum taptu tær tepurt 3-2 í tveimum venjingardystum móti Danmark, og tað er eitt gott tekin um, at føroyska liðið er sterkt. Ein orsøk til tað er, at nógvir av berandi spælarunum spæla í donsku kappingini. Av teimum 14, sum eru úttiknar, spæla fýra teirra við Amager VK og tvær við Ikast. At ein teirra, Sofía Purkhús, bleiv kosin besti spælari í donsku kappingini í fjør vísir bara, at hetta liðið hevur sera gott grundarlag at byggja á.