Fyrra hálvfinalan hjá monnum, sum verður spæld í Klaksvík leygardagin, er tann mest spennandi hálvfinalan. Gaman í eru sørvingar væl fremri í landskappingini, men Fleyr hevur vunnið á SÍ í ár 

Hálvfinalurnar í mansflogbólti eru tveir dystir, har tey gomlu feløgini spæla ímóti teimum “nýggju”.

Ikki tí, SÍ og ÍF hava bæði stoltar og drúgvar flogbóltstraditiónir, og hava verið við í landskappingini í nógv ár.

Men hyggja vit eftir flogbóltshagtølunum, so síggja vit, at tá tann skipaða landskappingin byrjaði, vóru tað serliga Fleyr og Mjølnir, sum gjørdu um seg fyrstu nógvu árini.

Gamaní vann ÍF sítt fyrsta meistaraheiti í 1989, men næsta tíggjuára-skeiðið var tað bert Fram, sum í 1997 megnaði at bróta sigursrøðina hjá Mjølni og Fleyr. Hjá ÍF hepnaðist loksins aftur at vinna meistaraheitið í 1999.

Fyrstu ferð í 2002
Fyrstu ferð sørvingar gjørdu ein vørr var í 2002, tá SÍ vann steypakappingina, men síðan tá hava sørvingar gjørt um seg. Fyrsta meistaraheitið hjá monnum kom til høldar í 2005, og síðan hava sørvingar vunnið fimm meistaraheiti afturat. Tey bæði seinastu í 2016 og í 2017.
Harafturímóti hevur tað gingið meira striltið hjá Fleyr, sum í hesi øldini bara hevur vunnið tvey meistaraheiti og steypakappingina einaferð.

Sørvingar koyra betur
Leygardagin er tað hálvfinalan í steypakappingini, sum er á skránni, og í fyrru hálvfinaluni skulu sørvingar spæla móti havnarmonnum.

Hyggja vit eftir landskappingini, so hevur SÍ klárað seg betur enn Fleyr í ár. 

Sørvingar liggja á øðrum plássi í landskappingini, gaman í langt aftanfyri Mjølnir, men eisini langt frammanfyri Fleyr.

Tað áhugaverda er tó, at SÍ er tað einasta liðið, sum í ár hevur vunnið á Mjølni, og í so máta kann tað geva eina ábending um, at sørvingar eru rímiliga væl fyri. 

Men sørvingar hava eisini tapt ímóti Fleyr í ár, og tað kann so hinvegin geva eina ábending um, at dysturin ikki er so einfaldur at spáa um, sum stigatalvan í landskappingini leggur upp til.

Gjørt stórt arbeiði
Sum nevnt frammanfyri, er SÍ eitt av teimum feløgunum, sum seinnu árini veruliga hevur myndað føroyskan flogbólt.
Felagið hevur, bæði á kvinnu- og á manssíðuni, lagt stóran dent á ungdómsmenning, og tað er heilt vist ein orsøk til, at felagið hevur klárað seg so væl síðan aldarskiftið.

Í fyrraárið gjørdu sørvingar tó tað bragd við teimum eldru, at teir ikki bara sópaðu teirra egnu ungu av vegnum; teir vunnu eisini steypafinaluna ímóti besta liði hjá ÍF.

Tað sigur eitt sindur, hvat man er uppi ímóti, tá man hevur við flogbólt í Sørvági at gera, og tað vita havnarmenn.

Finalan bjargar árinum
Bæði hesi feløgini, Fleyr og SÍ, eru í tí støðu, at eitt pláss í steypafinaluni bjargar kappingarárinum.

Samanborið við landskappingina er steypakappingin tann stutti vegurin til heiður, og við tí trýsti, sum er á í einari steypafinalu, kunnu smá ting gera, at tað ikki koppar tann vegin, sum styrkin annars leggur upp til.

Hvørt tað verður Fleyr ella SÍ, sum kemur í finaluna, sum verður spæld um tvær vikur, ber sjálvandi ikki til at siga við vissu, men vit mugu nokk staðfesta, at sørvingar bera favorittleiklutin við sær á vøllin í Klaksvík leygardagin.
 

Hálvfinalurnar í steypakappingini verða spældar soleiðis leygardagin 8. februar 2020 í Badmintonhøllini í Klaksvík:
 
KVINNUR
Kl. 13.00 MJØLNIR - KÍF
Kl. 15.00 SÍ - DRÁTTUR 

MENN
Kl. 17.00 FLEYR - SÍ
Kl. 19.00 MJØLNIR - ÍF

Stroyming verður á www.kvf.fo